“Apiso,” Tala o le Tusi a Mamona (2023)
Apiso
Fesoasoani i ona tagata ia talitonu ia Iesu
Sa faigaluega Apiso mo se masiofo o se sa Lamana. Sa aoao Apiso e uiga ia Iesu Keriso mai se faaaliga vaaia a lona tamā. Mo le tele o tausaga, sa talitonu o ia ia Iesu ma sa manao e mulimuli ia te Ia. Ae na te lei ta’uina atu lava i isi sa Lamana.
I se tasi aso, na sau ai se sa Nifae e igoa ia Amona i le malo e aoao sa Lamana e uiga ia Iesu ma le Atua. Sa talitonu le masiofo ma le tupu i mea na aoao atu e Amona. Sa iloa e le masiofo ma le tupu o le a afio mai Iesu i le lalolagi ma faia ina ia mafai ona faamagaloina tagata uma o e talitonu ia te Ia.
Alema 17:12–13; 18:33–36, 39–40; 19:9, 13
Sa lagona e le masiofo ma le tupu le Agaga Paia ma sa fiafia tele ma sa pauu i laua i le eleele. Na pauu foi Amona ma auauna. O Apiso sa na o le pau lea o le tagata na tu.
Sa manao Apiso e ta’u atu i tagata e uiga i lenei vavega. Sa faamoemoe o ia o le a talitonu tagata i le mana o le Atua ina ua latou vaai i le mea na tupu. O lea na tamoe ai Apiso mai lea fale i lea fale. Sa ia fai atu i tagata e o ma vaai po o le a le mea na faia e le Atua mo le masiofo ma le tupu.
E toatele tagata na o mai i le fale o le masiofo ma le tupu. Sa faateia i latou ona sa foliga mai o le masiofo, le tupu, ma a latou auauna uma ua maliliu.
Sa le mautonu tagata. Sa latou finau e uiga i le mea na tupu i le masiofo ma le tupu.
Ina ua toe foi mai Apiso, sa ia vaaia tagata o fefinauai. Sa faanoanoa o ia ona latou te lei vaai i le mana o le Atua. Ona ia tago lea i le lima o le masiofo, ma sa tu i luga le masiofo ma vivii atu ia Iesu.
Sa uu e le masiofo le lima o lana tane, ma sa tu i luga o ia. Sa ta’u atu e le tupu i tagata e uiga ia Iesu. Ona tutulai lea o Amona ma isi auauna. Sa latou ta’u atu uma i tagata ua suia i latou e Iesu. Ua latou mananao nei e fai na o mea lelei. E toatele tagata na talitonu ia i latou.
E pei lava ona faamoemoeina e Apiso, na vaai tagata i le mana o le Atua. E toatele tagata sa talitonu ia Iesu ma sa papatisoina. Sa faatasi ma i latou le Agaga o le Atua. Sa latou faatuina foi le Ekalesia i lo latou laueleele. Sa latou vaaia e fesoasoani Iesu i soo se tasi e salamo ma talitonu ia te Ia.