“O Le Tagavai o le Saolotoga,” Tala o le Tusi a Mamona (2023)
O Le Tagavai o le Saolotoga
Puipuia o le aia tatau e talitonu ai i le Atua
O Amalekia o se sa Nifae malosi tele. Sa manao o ia e avea ma tupu. Sa ia folafola atu e tuuina atu le pule i tagata sa fesoasoani ia te ia. E toatele tagata sa fiafia ia te ia ma taumafai e faia isi ia mulimuli atu ia te ia. Na taitai e Amalekia tagata e fai mea leaga. Sa mananao o ia ma e na mulimuli ia te ia e fasiotia tagata o e sa aoao atu e uiga ia Iesu Keriso.
O Taitaiau Moronae, le taitai o autau a sa Nifae, sa talitonu ia Iesu. Sa ia iloa sa faamanuiaina sa Nifae ona sa latou tausia poloaiga a le Atua. Sa ita tele o ia ona sa taitai ese e Amalekia tagata mai le Atua, ma taumafai e avea ma tupu, ma taumafai e faatiga i tagata.
Sa sasae e Moronae lona ofutele. Sa ia tusia ai e tatau i tagata ona manatua lo latou Atua, lo latou saolotoga, ma o latou aiga. Ona ia nonoaina lea i se pou ma faaigoaina o le tagavai o le saolotoga. Sa tatalo Moronae mo le faamanuiaga a le Atua. Sa ia faaali atu ia sa Nifae le tagavai o le saolotoga ma fai atu ia i latou e faatasi ma ia i le taua ma Amalekia.
Sa oofu tagata i o latou ofutau ma taufetuli atu ia Moronae. Sa latou saunia e tau mo le Atua ma o latou fale, aiga, ma le saolotoga. Sa latou osia se feagaiga, po o se folafolaga faapitoa, faatasi ma le Atua o le a latou mulimuli pea ia te Ia. Ona latou sauni lea e tau ma Amalekia.
Sa toatele le autau a Moronae. Sa fefe Amalekia. Sa taumafai o ia e sosola ese ma e na mulimuli ia te ia. Ae o le toatele o i latou sa popole ona sa tau Amalekia mo mafuaaga sese. E toatele o le a le toe mulimuli ia te ia. Na taofia e le autau a Moronae i latou o e sa mulimuli pea ia Amalekia, ae na o ese atu Amalekia ma nai isi tagata.
Na alu Amalekia i le laueleele o sa Lamana. Sa manao o ia ia fesoasoani sa Lamana ia te ia e tau faasaga ia sa Nifae. Ona ia maua lea o se autau e toatele atu, ma malosi atu. Sa ia faia ia feita le toatele o sa Lamana ia sa Nifae. Sa ta’u atu e le tupu o sa Lamana ia sa Lamana uma e sauni e tau ma sa Nifae.
Sa fiafia le tupu ia Amalekia. Sa ia faia Amalekia o se tasi o taitai i le autau a sa Lamana. Ae sa manao Amalekia i se pule e sili atu.
Na faia e Amalekia se fuafuaga e pulea sa Lamana. Sa ia pulea le autau atoa a sa Lamana. Ona ia tuu atu lea i ana auauna e fasioti le tupu ma pepelo po o ai na faia.
Na faafoliga Amalekia ua ita i le fasiotia o le tupu. Sa fiafia sa Lamana ia Amalekia. Sa faaipoipo o ia i le masiofo ma avea ma tupu fou. Sa manao o ia e pule foi i tagata sa Nifae. Sa ia talanoa leaga e uiga ia sa Nifae ina ia feitai sa Lamana ia i latou. E lei umi, ae mananao le toatele o sa Lamana e tau ma i latou.
A o maua e Amalekia le pule e ala i le pepelo, sa saunia e Moronae ia sa Nifae e faalagolago i le Atua. Sa ia tuuina le tagavai o le saolotoga i luga o olo uma i le laueleele e faamanatu atu ai ia i latou la latou folafolaga. Na saunia foi e autau a Moronae ia aai o sa Nifae mo le taua. Sa latou fauina ni puipui ma eliina ni alavai ina ia saogalemu ma malolosi ai aai.
Ina ua o mai sa Lamana e tau, sa le mafai ona latou oo atu i aai o sa Nifae. Sa taofia i latou i puipui ma alavai na fai e autau a Moronae. E toatele sa Lamana na maliliu ina ua latou osofaia sa Nifae. Sa ita tele Amalekia. Sa ia folafola atu e fasioti Moronae.
Sa faafetai sa Nifae i le Atua mo le fesoasoani ma le puipuia o i latou. Sa latou faasaogalemuina o latou aai ma fausia nisi aai. Sa faaauau pea le taua ma sa Lamana, ae na fesoasoani le Atua ia Moronae ma ana autau e tausia le saogalemu o sa Nifae. Sa fiafia sa Nifae. Sa latou usiusitai i le Atua ma tumau faamaoni ia te Ia.