“Mosaea ma Senifa,” Tala o le Tusi a Mamona (2023)
Mosaea ma Senifa
Puipuia e le Alii
Sa tele taua a sa Nifaē ma sa Lamanā. I se tasi aso, na ta’u atu ai e le Alii i se sa Nifae e igoa ia Mosaea e tuua le laueleele o Nifae faatasi ma soo se tasi o le a mulimuli i le Alii.
E toatele sa Nifaē sa usitai i le Alii ma o ma Mosaea. Sa taitai atu i latou e le Alii i se laueleele sa nonofo ai ni tagata. Sa ta’ua i latou o le nuu o Sara’emila
O tagata o Sara’emila na o mai foi mai Ierusalema i aso la ua leva. Sa latou fiafia ua auina atu e le Alii ia sa Nifaē faatasi ma papatusi apamemea. Na faatasi atu le nuu o Mosaea i le nuu o Sara’emila. Na filifili e tagata uma ia Mosaea e fai ma o latou tupu. Sa ia aoao atu i latou e uiga i le Alii.
Sa nonofo sa Nifaē i Sara’emila mo sina taimi ae toe foi atu loa se vaega toatele i le laueleele o Nifae. Sa taitaiina i latou e se sa Nifaē e igoa ia Senifa.
Ua nonofo nei sa Lamanā i le laueleele o Nifae, o lea na fesili atu ai Senifa i lo latou tupu pe mafai foi ona nonofo ai ona tagata iina. Na malie i ai le tupu.
Sa faatogafiti e le tupu ia Senifa ma lona nuu. Sa ia tuu atu ia i latou e nonofo i le laueleele o Nifae ina ia mafai ona ia aveina nisi o a latou meaai ma manu i se taimi mulimuli ane. Sa nonofo ai iina tagata o Senifa i le filemu mo le tele o tausaga. Sa latou totoina le tele o meaai ma sa tele ni manu sa i ai. Ona osofaia lea e sa Lamanā ma taumafai e ave a latou meaai ma manu.
Sa aoao e Senifa lona nuu ia faalagolago i le Alii. Ina ua o mai sa Lamanā e tau ma i latou, sa tatalo Senifa ma lona nuu i le Alii. Na tuuina atu e le Alii ia i latou le malosi ma fesoasoani e puipuia i latou. Sa mafai ona latou tuliesea sa Lamanā. Sa faamanuiaina e le Alii Senifa ma lona nuu mo lo latou faatuatua.